17 верасня — Дзень народнага адзінства

15.09.2023

Дзень народнага адзінства — самае "маладое" дзяржаўнае свята Беларусі. Ён быў устаноўлены Указам Прэзідэнта Рэспублікі Беларусь ад 7 чэрвеня 2021 г. № 206 як сімвал гістарычнага афармлення беларускай нацыі.

17 верасня 1939 г. пачаўся Польскі паход Чырвонай арміі, вынікам якога стала ўключэнне зямель Заходняй Беларусі ў склад БССР. У сучаснай Беларусі гэты дзень шануюць як акт гістарычнай справядлівасці ў дачыненні да беларускага народа, падзеленага супраць яго волі ў 1921 годзе па ўмовах Рыжскай мірнай дамовы. Адноўленае ў 1939 годзе адзінства дазволіла Беларусі выстаяць у гады Вялікай Айчыннай вайны, заняць пачэснае месца ў міжнароднай супольнасці, стаць адным з сузаснавальнікаў Арганізацыі Аб'яднаных Нацый.

Беларускі народ адзіны ў выбары стратэгічнага курса на развіццё моцнай, суверэннай і квітнеючай краіны. Устанаўленне Дня народнага адзінства 17 верасня падкрэслівае пераемнасць пакаленняў, непахіснасць і самадастатковасць беларускай нацыі і дзяржаўнасці.

У цяперашнім годзе з 7 па 16 верасня праходзіць рэспубліканская акцыя "Сімвал адзінства — 2023".

Старт акцыі "Сімвал Адзінства — 2023" дадзены на найвышэйшым пункце Беларусі — гары Дзяржынскай у Мінскай вобласці 7 верасня. Дзень за днём удзельнікі акцыі наведвалі розныя рэгіёны краіны: 8 верасня — Магілёў, 9 верасня — Гродна, 11 верасня — Віцебск, 12 верасня — аграгарадок Ленін у Жыткавіцкім раёне Гомельскай вобласці, 15 верасня — Баранавічы ў Брэсцкай вобласці. Завершыцца акцыя ў Мінску адкрыццём алеі Адзінства.

Галоўная мэта акцыі — кансалідацыя грамадзянскай супольнасці ў адзінай ідэі міру і стварэння пад сімваламі рэгіёнаў, а таксама садзейнічанне выяўленню ідэнтычнасці кожнага асобнага рэгіёну краіны ў адзінай суцэльнай самабытнасці ўсёй Беларусі.