Новыя гарызонты супрацоўніцтва Рэспублікі Беларусь і Рэспублікі Бурація

25.08.2025

Ва Улан-Удэ пад сумесным кіраўніцтвам Старшыні Дзяржаўнага камітэта па навуцы і тэхналогіях Рэспублікі Беларусь Сяргея Шлычкова і кіраўніка Рэспублікі Бурація Аляксея Цыдзенава адбылося пасяджэнне, падчас якога бакі прааналізавалі ход рэалізацыі Плана мерапрыемстваў па развіцці гандлёва-эканамічнага, навукова-тэхнічнага і культурнага супрацоўніцтва на перыяд 2023-2027 гадоў. У фокусе абмеркаванняў апынуліся перспектывы ўзаемадзеяння ў такіх стратэгічна важных сферах, як сельская гаспадарка, прамысловасць, гандаль, ахова здароўя і турызм.

Кіраўнік Бураціі Аляксей Цыдзенаў падкрэсліў уражлівы рост тавараабароту. "За апошнія пяць гадоў тавараабарот па прамысловай і харчовай прадукцыі паміж Бураціяй і Беларуссю вырас у чатыры разы, і патэнцыял росту захоўваецца", — заявіў ён. Паводле яго слоў, у Беларусь актыўна пастаўляюцца камплектуючыя, а з Беларусі — высокатэхналагічныя вырабы. Рынак Бураціі ўжо знаёмы з беларускімі малочнымі прадуктамі, а "Буратмяспрам" павялічвае аб'ёмы закупак.

"Я хачу ў першую чаргу выказаць падзяку Сяргею Уладзіміравічу, усёй камандзе, якая працуе ў нас тут, у Рэспубліцы. Напрамкаў у нас дастаткова шмат, і я абсалютна ўпэўнены, што тавараабарот будзе толькі расці – і матэрыяльна, і ў выглядзе паслуг. Мы бачым перспектывы далейшага супрацоўніцтва", — адзначыў Аляксей Цыдзенаў.

Старшыня ДКНТ Сяргей Шлычкоў, у сваю чаргу, акцэнтаваў увагу на неабходнасці далейшага павелічэння ўзаемнага тавараабароту, асабліва ў цяперашніх няпростых эканамічных умовах. Ён вылучыў прапрацоўку пытанняў супрацоўніцтва ў сферы паставак спецыяльнай тэхнікі — пажарнай, камунальнай і іншай, што, паводле яго слоў, і абумовіла склад беларускай дэлегацыі. Сяргей Шлычкоў асабліва адзначыў, што ключавы ўклад у экспарт тавараў у Рэспубліку Бурація ўносяць прадстаўнікі бізнесу.

"У сувязі з гэтым перад намі стаіць задача па стварэнні ўмоў развіцця ўзаемадзеяння бізнес-структур Беларусі і Бураціі і актывізацыі прамых паставак у абодвух напрамках", — заявіў Старшыня ДКНТ. Ён таксама дадаў, што вялікая зацікаўленасць у далейшым супрацоўніцтве назіраецца ў сферы аховы здароўя, а таксама ў развіцці турызму і арганізацыі турыстычных патокаў у абедзве Рэспублікі. Сяргей Шлычкоў выказаў цвёрдае перакананне, што дамоўленасці, дасягнутыя ў ходзе візіту беларускай дэлегацыі, безумоўна, нададуць новы, магутны імпульс двухбаковаму супрацоўніцтву.

Па словах мэра, цяпер актыўна прапрацоўваецца пытанне аб арганізацыі прамых паставак беларускіх прадуктаў ва Улан-Удэ. Дэталёва прагавораны канкрэтныя механізмы ўзаемадзеяння, уключаючы лагістыку. "У нас ва Улан-Удэ пад брэндам "Беларускія тавары" працуюць 16 магазінаў. Больш за тое, мы рэгулярна праводзім кірмашы, якія карыстаюцца папулярнасцю ў нашых жыхароў. Наш бок прапанаваў беларускаму бізнесу прывабныя ўмовы арэнды гандлёвых плошчаў ва Улан-Удэ. Гэта будзе добрай справай і для жыхароў горада, і для развіцця нашых двухбаковых адносін. Ужо цяпер мы зводзім нашых прадпрымальнікаў адзін з адным і дапамагаем ім знайсці агульныя падыходы для далейшай працы, каб яны маглі пастаўляць адзін аднаму прадукцыю", — паведаміў Ігар Шуцянкоў.

Кульмінацыяй пасяджэння Рабочай групы стала падпісанне шэрагу важных дакументаў, закліканых умацаваць намечаныя сувязі. Сярод іх: мемарандум аб супрацоўніцтве паміж Асацыяцыяй экспарцёраў і імпарцёраў Бураціі і канцэрнам "Белдзяржхарчпрам", пагадненне аб намерах паміж мінскім малочным заводам № 1 і кампаніяй "Чайны шлях", а таксама пагадненні аб супрацоўніцтве ў галіне аховы здароўя паміж Рэспубліканскай клінічнай бальніцай ім. Н. А. Сямашка і 6-й гарадской клінічнай бальніцай Мінска, а таксама паміж Бурацкім рэспубліканскім клінічным анкалагічным дыспансерам і Мінскім гарадскім клінічным анкалагічным цэнтрам.

Каардынатарамі супрацоўніцтва выступаюць Дзяржаўны камітэт па навуцы і тэхналогіях з беларускага боку і Міністэрства эканомікі Рэспублікі Бурація – з расійскага.

Крыніца: ДКНТ