Адкрылася выстава дасягненняў беларускай навукі «Беларусь інтэлектуальная»
20.01.2023
У Нацыянальным выставачным цэнтры «Белэкспа» адкрылася выстава дасягненняў айчыннай навукі «Беларусь інтэлектуальная», арыентаваная на шырокую аўдыторыю прадстаўнікоў усіх слаёў беларускага грамадства.
Дадзеная выстава з'яўляецца міжведамаснай. На ёй прадстаўлены распрацоўкі навукоўцаў з Нацыянальнай акадэміі навук Беларусі, Міністэрства адукацыі, Міністэрства аховы здароўя, Міністэрства прамысловасці і многіх іншых навуковых арганізацый.
Экспазіцыя на выставе арганізавана па розных кластарах. У іх ліку – штучны інтэлект, IT-тэхналогіі, робататэхніка; мікраэлектроніка і яе кампанентная база; абароназдольнасць і ваенная навука; электратранспарт і яго базавыя кампаненты; тэхналогіі для асваення касмічнай прасторы; энергетыка, экалогія, прыродакарыстанне; біятэхналогіі і біяматэрыялы; фармацыя, ахова здароўя, медыцына; аграпрамысловы комплекс, прадукты харчавання; прастора моладзевых ініцыятыў.
Кластар па тэматычнаму блоку «Камерцыялізацыя распрацовак» прадстаўляе Дзяржаўны камітэт па навуцы і тэхналогіях. На адабраных для экспазіцыі узорах, а таксама ў форме відэаролікаў ілюструецца роля ДКНТ і яго падведамасных арганізацый (ДУ «БелІСА», НЦІУ, РНТБ, Белінфонд) у стварэнні і камерцыялізацыі навуковых распрацовак.
Таксама ў рамках дадзенага тэматычнага блока наведвальнікі выставы маюць магчымасць пазнаёміцца з найбольш яркімі прыкладамі інавацыйных распрацовак рэзідэнтаў беларускіх тэхнапаркаў, сярод якіх можна адзначыць:
інфармацыйны комплекс тэлемедыцынскай дыягностыкі «Агляд+», які праводзіць апытанне на наяўнасць скаргаў на самаадчуванне, вызначае факт прыёму наркатычных сродкаў, а таксама праводзіць тэст для ацэнкі стану чалавека, забяспечвае падключэнне дадатковага медыцынскага абсталявання з мэтай пашырэння функцыяналу сістэмы, выключае прамы кантакт абследуемага і медработніка (Таварыства з абмежаванай адказнасцю «Белтэлемед тэхналогіі»);
трэнажор для імітацыі хадзьбы «КРОК», прызначаны для стымулявання мышц ніжніх і верхніх канечнасцяў і выканання комплексных практыкаванняў у вертыкальнай пазіцыі (Таварыства з абмежаванай адказнасцю «СТЫЛЬСТРОЙ-ТСК»);
арка дэзінфекцыі «Gate_0» Basic з пандусамі. На выставе прадстаўлена мадэль базавай камплектацыі, аднак гэты выраб таксама выпускаецца з пашыранымі магчымасцямі, якія дазваляюць загадзя распазнаваць сімптомы вірусных захворванняў у людзей у месцах масавага збору і не дапускаць іх далейшага распаўсюджвання (Таварыства з абмежаванай адказнасцю «Інката»).
На выставе таксама дэманструюцца праграмнае забеспячэнне ў галіне медыцынскай дыягностыкі, лічбавай жывёлагадоўлі, анлайн-сістэма інтэлектуальнага кіравання катэджным пасёлкам і шмат іншых цікавых айчынных распрацовак.
Для наведвальнікаў уваход вольны.
|